АҚШ президентлигига республикачилар партиясидан номзод бўлган миллиардер Дональд Трамп EgyptAir авиакомпаниясининг А320 русумли самолёти Ўрта Ер денгизи ҳудудида қулаб тушишини навбатдаги теракт амалга оширилиши сифатида баҳолади. Бу ҳақда у ўзининг твиттердаги саҳифасида ёзган.

"Бу воқеага навбатдаги теракт сифатида қарайман. Самолёт Париждан парвоз қилганди. Қачон биз ўзимизни бу муаммога нисбатан кераклича тутамиз? Бунга ақл билан қараш керак ва огоҳликни унутмаслик лозим", дея қайд этган Трамп.

Бундан олдинроқ, Россия Федерал хавфсизлик хизмати директори Александр Бортников ҳам бу ҳодиса теракт туфайли содир бўлгани эҳтимоли ҳақида гапириб ўтганди.

Париждан Қоҳирага парвозни амалга оширган EgyptAir самолёти Ўрта Ер денгизи ҳудудида, Греция ҳаво ҳудудидан Миср ҳаво ҳудудига ўтганида денгизга қулаган. Унинг бортида жами 66 киши бўлган.