Ўзбекистон мева ва сабзавотларни қайта ишлашга ихтисослаштирилган савдо-логистика марказларини ташкил этиш ва юритиш борасида ҳолланд компаниялари тажрибаларини ўрганишни режалаштирган. Бу ҳақда “Ўзбекозиқовқатхолдинг” вакилига таяниб Sputnik хабар қилди. 

Манба хабарига кўра, томонлар делегация ташрифини ташкиллаштириш тўғрисида келишиб олди. Делегация таркибига мева ва сабзавотларни ишлаб чиқариш ҳамда қайта ишлаш соҳасидаги ўзбек экспертлари ҳамда тадбиркорлар кирди. Ташриф 22-27 май кунларига белгиланган. 

“Нидерландияликлар бугунги кунда мева-сабзавотлар, гўшт-сут маҳсулотларини ишлаб чиқариш, қайта ишлаш ҳамда экспорт қилиш борасида Европада етакчилардан ҳисобланади. Ўзбекистон бу йил комплекс савдо-логистика марказлари тармоғини ташкил этиш бўйича тараққиёт дастури амалиётини бошлади. Бу ерда аграр сектор маҳсулотлари аввалгидек, нафақат оддий омбор биноларида сақланади, энди замонавий совутиш тизимлари ҳам пайдо бўлади. Шунингдек, марказларда бренд озиқ-овқат маҳсулотларини қайта ишловчи ташкилотлар фаолияти йўлга қўйилади”, - билдирди корпорация вакили.

Бу Ўзбекистон учун янги йўналиш, шунинг учун соҳада, айниқса, менежмент ва маҳсулотларни сертификатлаш стандартлари соҳаларида илғор Европа тажрибасини ўрганиш лозим. 

Ҳозирги кунда Ўзбекистон ҳудудида янги савдо-логистика комплексларини ташкил этиш учун 11та истиқболли манзиллар белгилаб қўйилган.