Autocar интернет порталининг ёзишича, автомобилларни ҳайдовчисиз бошқариш тизими транспорт воситаларининг нархини камида 10 минг фунт стерлинг (14500 АҚШ доллари)га қимматлашишига олиб келади. Швециянинг Volvo автомобилсозлик компанияси техник мутахассиси Эрик Коэлин шундай фикрда. 

Ҳайдовчисиз машиналар келажагига бағишланган Лондон анжуманида иштирок этган Коэлиннинг айтишича, машина нархлари бутловчи қисмларни ишлаб чиқариш ҳажмига боғлиқ бўлиши табиий. Бироқ бундай автомобиль учун камида 9 та камера, шунча радар ва ИК-диапазонли лазер қурилмаси ҳам лозим. У маълумотларни бешта ўта кучли компьютерга узатади. 

Коэлиннинг қайд этишича, компанияларни хавфсизлик билан боғлиқ масалалар ташвишга солмоқда. Улар ҳар қандай кутилмаган ҳодисаларни эътиборга олишни хоҳлашади. 

Volvo’нинг автоном бошқарув технологияси Drive PX платформаси негизида барпо этилган. У инфратузилмаларга боғлиқ бўлмай, автомобилга ўрнатилган датчиклар ёрдамида ҳаракатланади.