Бутунжаҳон соғлиқни сақлаш ташкилоти (БССТ) сариқ безгак билан касалланган 2,4 минг ҳолатни қайд этди, шу жумладан Анголада тўрт ой ичида 300 нафар киши ундан ҳалок бўлди. Бу ҳақида БССТ бош директорининг ёрдамчиси Брюс Эйлвард маълум қилди. 

"Юқори ўлим кўрсаткичи касалликнинг "портловчи" табиатга эга эканлигини ҳамда унинг бутун дунё бўйлаб тарқалиш хавфи борлигини тасдиқлайди", - дейди Рейтер агентлиги. 

Амалдорнинг сўзларига кўра, ҳозирги вақтда сариқ безгакнинг авж олиши соғлиқни сақлаш соҳасида дунё миқёсидаги фавқулодда ҳолат ҳисобланмайди, уни заҳирадаги вакциналар ёрдамида бартараф этиш мумкин. Бироқ шаҳар ҳудудида касалликнинг янги ўчоқлари пайдо бўлса, вазият мураккаблашиши мумкин.

Касаллик билан курашиш учун БССТ жорий ойнинг охирига қадар бутун дунё аҳолисини етти миллион доза вакцина билан таъминлашни ўз олдига мақсад қилиб қўйди. БССТ дозалар сони чекланганлигини билдирди. 

Ташкилот Ангола ва КДРда оммавий вакцинация ўтказишни ва касаллик ташувчи чивинларнинг кўпайишини назорат қилишни маслаҳат беради.
Сариқ безгак - ўткир юқумли касаллик. У чивинлар орқали юқади. Касаллик тропик ва субтропик мамлакатларда кенг тарқалган бўлиб, унинг аломатлари - юқори тана ҳарорати, умумий ҳолсизлик, оғиз бўшлиғида, ошқозон ва ичаклардан қон келиши, жигар ва буйракларнинг шикастланиши, сариқ касал. Сариқ безгак ўлим билан тугаш хавфи юқори бўлган ўта оғир инфекциялар қаторига киради.