Бахтсиз ҳодисадан жабр кўрган британиялик Жеймс Янг тажриба дастури иштирокчисига айланди ва компьютер ўйини қаҳрамониники сингари бионик қўлга эга бўлди. Бу ҳақда The Daily Mail ҳикоя қилмоқда. 

2012 йили 22 яшар Жеймс Янг ҳаракатланаётган поезд вагонлари орасига тушиб кетиб кўплаб жароҳатлар олади. Унинг бош суяги асоси синган, юзига зиён етган, қовурғалари синган, умуртқаси дарз кетган, чап қўли ва оёғининг бир қисмидан айрилган. Тез ёрдам вертолётида йигитни Лондонга етказилади ва у деярли икки ҳафта комада бўлган. Жабрдийданинг юзи ва танасини иложи борича тиклаш учун 12 та жарроҳлик амалиёти зарур бўлди. 

Уч ярим ойдан кейин касалхонадан чиққач, Янгга, унинг таъбирича, “хунук” стандарт протезлар берилган. Табиийки, қатор қийинчиликлар уни ҳолдан тўйдирган. 
Бир йилдан сўнг Янг Konami ўйин компаниясининг футуристик бионик қўлни синаб кўриш учун қўлсиз одам излаб берган эълонига кўзи тушади. 

Қўл дизайнини аввал фильм махсус эффектлари устида иш олиб борган рассом яратди. Рассомни  Konami’нинг Metal Gear Solid V: The Phantom Pain компьютер ўйини қаҳрамони Снейк образи илҳомлантирган. Протез устида Open Bionics компанияси ҳам ишлади. 

Британиялик йигит BBC3 ҳужжатли фильми қаҳрамонига айланди. Фильмда у янги қўлининг ишлашини намойиш этди ва унга соат, лазерли ёритгич ва телефонни зарядлаш учун USB-порт, елка қисмига эса кичикроқ дрон ўрнатилганини сўзлаб берди. Бионик қўл Янг терисига бириктирилган датчиклар ёрдамида мушак сигналларни тушуна олади ва аккумулятор орқали ишлайди. 

“Менинг ишим шифокорлар билан дори воситалари хусусида гаплашишни тақозо этади. Шунинг учун мен Терминатор каби кимнидир ўлдирмоқчидек кўринишни кўринишни истамайман”, - дейди Жеймс Янг.

Афзалликларига қарамасдан, бионик қўлни доим тақиб юриш мумкин эмас. Уни чўмилганда, ухлаганда, қолаверса, унинг 4,5 килограммли оғирлигидан дам олиш учун ечиб қўйишга тўғри келади. Бундан ташқари, вақти-вақти билан қўл созламаларини мўътадиллаштириб туриш керак, чунки бу прототип ҳисобланади.