Абу-Дабидан жанубда, чўл ўртасида яқин орада Oasis Eco Resort деб номланган инновацион меҳмонхона пайдо бўлади. Бу меҳмонхона унинг муаллифлари томонидан "сайёранинг энг яшил гўшаси" деб таърифланмоқда. Чўлда-я, дейсизми? Аҳамиятсиз. Курорт атрофдаги қумни ҳақиқий оазисга айлантириш учун барча зарур нарса билан таъминланади.

Оқова сувларнинг қайта ишланиши, умуман чиқиндиларнинг йўқлиги ҳамда меҳмонхонанинг бутун структурасига етадиган қуёш батареялари. Қурилиш ҳозирданоқ бошланди ва архитекторлар ишни 2020 йилгача якунлашни режалаштиришмоқда. 

Бу ерда 84 та ҳашаматли люкс хоналар жойлашади, уларнинг ҳар бирининг ойнаси марказий оазисга очилади.

Oasis Eco Resort’да ташриф буюрувчиларнинг картмонлари ижозат бера оладиган барча нарса: фитнес-марказлар, спа-зоналар, рекреацион хоналар ва дунёнинг етакчи бош ошпазлари таклиф қилиниши режалаштирилаётган ресторанлар муҳайё бўлади.

Меҳмонхона асосчилари шу ерда етиштириладиган сабзавотлардан фойдаланишни таклиф қилишмоқда.

Юлдузсимон ташқи деворлар рекреацион фаолиятни амалга ошириш ва қишлоқ хўжалиги ўсимликларини суғориш учун фойдаланиладиган манбани ўраб туради.
Меҳмонхонанинг ясси томи тўлиқ қуёш панеллари билан қопланади. Чўлнинг жазирма иссиғи яхшигина асқатади: меҳмонхонадаги барча тизимлар фақатгина қуёш энергиясидан фойдаланади. 

Албатта, мураккаб эко-тизимни қўллаб-қувватлаш учун малакали ходимлар керак бўлади. Профессионал биолог ва ботаниклар гуруҳи сунъий оазисни сақлаш устида доимо иш олиб борадилар.