EgyptAir авиакомпаниясининг А320 самолёти ҳалокатга учраши билан боғлиқ фожиа бўйича суриштирув ишларини олиб бораётган Айман ал-Муқаддамнинг баёнот беришича, мисрлик терговчилар расмий Париждан учувчиларнинг диспетчерлар билан суҳбатини тақдим этишни сўраган. 

«Мен, самолёт капитани парвозга тайёрлигини маълум қилгач, у ва диспетчерлик минорасидаги ходим ўртасида бўлган мулоқотни тақдим этишларини сўрадим», — деган ал Муқаддам. 

Унинг сўзларига кўра, Миср томони етакчилигидаги тергов гуруҳига фуқаро авиациясининг турли соҳаларидан жалб этилган маҳаллий экспертлар, хусусан, учувчилар, муҳандислар ва навигация мутахассислари киритилган. 

Бундан аввал, Миср ташқи ишлар вазири Самех Шукри, расмий Қоҳира EgyptAir авиакомпаниясининг Airbus А320 самолёти ҳалокатини ўрганишда АҚШдан ёрдам сўрагани ҳақида баёнот берган эди.