Олмаотада 20 май эрталабки пайт Республика майдонидаги Олтин одам ҳайкали ёнидаги автотураргоҳдан Абай кўчасигача йўл қисми ўраб олинди. Воқеа жойига полициячилар, ўт ўчирувчилар, сапёр ва кинологлар ўз итлари билан етиб келганлар. Бу ерда иккита шубҳали пакет, арматура ва керосинли идишлар аниқланган. 

Ўтказилган тезкор тадбирлар давомида Республика ва Остона майдонлари ёнидаги яширин жойларда ёнувчи аралашмали бутилкалар, ўнлаб арматура бўлаклари, металл калтаклар ва бензинли канистралар аниқланган, деб хабар бермоқда Олмаота ички ишлар департаментига иқтибос келтирган ҳолда nur.kz нашри.  

Шаҳарнинг Олмола ва Медеус туманларидаги квартираларда бир неча ўқотар қурол, жумладан Макаров ва "ТТ" тўппончалари, калталатилган милтиқлар, бир неча ўқ дори, 4 та РГД-5 гранатаси, шунингдек 5 млн тенге миқдоридаги пул аниқланган.

Бунга алоқадорликда гумонланиб 5 киши ички ишлар идораларига етказилган.

Айни вақтда судгача тергов олиб борилмоқда ва бу қонунбузарликларга алоқадор гумонланувчилар билан алоқада бўлганлар текширилмоқда. 

Тасдиқланмаган маълумотларга кўра, озиқ-овқат дўконларидан биридан портловчи модда олиб чиқилган. 

Бундан ташқари, Остона майдони яқинида Қозоғистон-Британия техника университетида ҳам полиция ва ўт ўчириш ходимлари тўпланган.