Руминиянинг "Тиргу-Муреш" футбол клуби ҳужумчиси Адриан Муту профессионал футболчилик фаолиятини якунлаганини маълум қилди.

"Футбол майдонида узоқ йиллардан кейин тўхташ ва фаолиятни якунлаш вақти келди. Менга ишда ва ҳаётда ёрдам берганларга миннатдорчилик билдирмоқчиман. Мен тўп сурган барча клублар ва айниқса "Фиорентина"га раҳмат айтмоқчиман. Руминия термасига раҳмат, мен ҳанузгача 35 та тўп билан терма жамоанинг энг яхши тўпурариман. Мен доимо орзу қилганимни – мухлислар муҳаббатини қозона олдим. Бу бебаҳодир. Менинг болаликдаги орзуимнинг амалга ошишида кўмак берган барчага раҳмат. Мен фаолиятим давомида олган ҳиссиётларим абадий мен билан қолади". деб айтди Муту.

37 ёшли футболчи жорий мавсумда Руминия термасининг 4 та ўйинида иштирок этди.

Муту "Интер", "Верона", "Парма", "Челси", "Ювентус", "Фиорентина", "Чезена", "Аяччо" каби жамоаларда тўп сурган. Футболчи Руминия термаси сафида 77 ўйинда майдонга тушиб, 35 та тўп муаллифига айланган.