Москванинг «Динамо» жамоаси футболчиси Андрей Ещенко шаҳар кўчаларидан бирида номаълум шахслар томонидан калтакланган. Бу ҳақда 22 май куни sovsport.ru хабар тарқатди.

Маълум қилинишича, ушбу ҳодиса Никита дарвозаси майдонида рўй берган. Манбанинг маълумотига кўра, ичида футболчи бўлган Range Rover автомобили майдонда тўхтаган ва кейин тўполон бошланган. Автомобиль ҳайдовчиси ва бошқа йўловчилар бир неча дақиқа давомида футболчини калтаклашган ва кейин воқеа жойидан кетишган. Воқеа жойига полициячилар етиб келишган, жабрланувчи тергов-суриштирув ишлари учун маҳкамага олиб кетилган.

21 май куни футбол бўйича Россия чемпионатининг охирги турида «Динамо» «Зенит»дан 0:3 ҳисобида мағлуб бўлди ва ўз тарихида илк марта олий дивизионни тарк этди.

Жорий мавсумда Ещенко «Динамо» сафида 9та учрашув ўтказди. У жорий мавсумнинг иккинчи давраси арафасида «Анжи» сафидан ижара асосида москваликлар жамоаси таркибига келиб қўшилганди.