Олимпиада-2016’га тайёргарлик кўраётган, елканли спорт бўйича Испания терма жамоаси аъзолари Рио-де-Жанейрода қуролланган ўсмирлар ҳужумига учрадилар. Бу ҳақда 21 майда Испания елканли спорти федерациясида маълум қилинди.

Воқеа 21 май куни эрталаб Санта-Тереза туманида, Пекиндаги Олимпиада чемпиони Фернандо Эчаварри, жаҳон чемпиони Тара Пачеко ва уларнинг мураббийи Санти Лопес-Веласкес нонушта қилгани кетаётганларида юз берган.

Мураббийнинг маълум қилишича, уларнинг ёнига 5 нафар тўппонча билан қуролланган ўсмирлар келган. Спортчилар ёнларида бўлган барча нарсаларни жиноятчиларга бериб юборишларига тўғри келган. Ҳеч ким жабрланмаган, бироқ мураббийнинг таъкидлашича, бу "ёқимсиз тажриба" бўлган.

Бразилия бир қатор халқаро мусобақалар, жумладан футбол бўйича 2014 йилги Жаҳон чемпионати ва 2016 йилги Олимпия ўйинларини ўтказиш ҳуқуқини олгандан кейин, мамлакат раҳбарияти жиноятчиликка қарши катта кўламдаги дастурни бошлаган эди. 2008 йилдан ўтказиб келинаётган бу дастур доирасида Рио-де-Жанейро фавелларида (аҳолининг ночор қатлами яшайдиган харобалар)  36 та полиция бўлими очилган.

Аввалроқ собиқ жаҳон чемпиони, машҳур бразияликлик футболчи Ривалдо ўз юртида Олимпия ўйинларига мухлисларни ташриф буюрмасликка чақирган эди. Ривалдо бу ҳақда 17 ёшли қиз жиноятчилар томонидан ўлдириб кетилгандан кейин ижтимоий тармоқда ёзганди.

Рио-де-Жанейродаги 4 йилликнинг асосий спорт мусобақаси 5-21 август кунлари бўлиб ўтади.