Дубай ҳукумати коммунал хўжалик соҳасида ностандарт қарорга келишди. Турар жойларнинг давлат стандартларига жавоб беришига доир зерикарли текширувлар натижаси одатда "кадр ортида" қолади.

National газетасининг хабар беришича, эндиликда турар жойларнинг сифатига баҳо беришда бир неча ўн йиллардан бери дунё меҳмонхона саноатида қўлланиб келинаётган "юлдузли тизимни" жорий қилиб вазиятни ўзгартириш керак.

Нашриётнинг берган маълумотларига кўра, амирликдаги кўп қаватли уйлар бундан буён биттадан бештагача юлдузга эга бўлади, бу турар жойлардаги хизмат сифатини яхшилаш ва уларда яшовчи аҳоли хавфсизлигини таъминлаш имконини беради. Дубай муниципалитети ердан фойдаланиш департаментининг мазкур ташаббуси эксперт ҳамжамияти ҳамда мегаполис аҳолиси ўртасида турли баҳс-мунозараларга сабаб бўлди. Маҳаллий ҳукуматнинг у ёки бу бинони баҳолашдаги тамойиллари энг асосий "тўсиқ" бўлиб қолмоқда. 

"Бундай рейтингларнинг қанчалик ҳаққонийлиги ҳамда маҳаллий ҳокимият инспекцияларни ўтказиш учун етарли малакали ходимларга эга ёки йўқлиги номаълум. Бу жуда мураккаб жараён. Турар жойларда кўплаб техник ускуналар ўрнатдик, уйларни фақат ташқи кўринишидан баҳолаш адолатсиз бўлади. Бошқа томондан эса биноларнинг бир қисми турли сабабларга кўра беш ёки икки юлдузга эга бўлиши мумкин", - дейди Silicon Oasis ноҳияси Кўчмас мулк эгалари ассоциацияси раҳбари Эндрю Де Коста.

Унинг сўзларига кўра, "ҳақиқатдан ҳам рейтинг тизими ахлоқсиз уй эгаларига таъсир ўтказишнинг самарали усули бўлиб, бу кўчмас мулкнинг нархига ҳам таъсир кўрсатади. Бироқ бунинг учун таҳлил ҳаққоний ва объектив бўлиши керак".

Газетанинг маълум қилишича, 20 мингдан ортиқ ер майдонлари ва 120 минг кўчмас мулк объектлари экспертлар томонидан баҳоланди. Мутахассислар жойларга бориб, у ерларда суратга олиш, ёнғин хавфсизлиги ҳамда хизмат даражасини баҳолаш ишларини амалга оширишди. Шу муносабат билан жамоатчилик яқин кунларда Дубайдаги кўчмас мулкларнинг янгича "юлдузли" тизим маълумотларидан воқиф бўлиши мумкин.

Куннинг энг асосий ва қизиқ хабарларидан тезкор равишда хабардор бўлиш учун «Kun.uz»нинг Telegram’даги каналига аъзо бўлинг.