Эрон ва Ҳиндистон ҳукуматлари, Эроннинг Чобаҳор портини ривожлантиришга оид икки томонлама келишувни имзолади. Расмий Деҳли ва Теҳрон, Чобаҳорни Чобаҳор-Зоҳидон-Заранж транспорт йўлагининг йирик портига айлантирмоқчи.

Ҳужжатларни имзолаш маросими,  Теҳронга ташриф буюрган Ҳиндистон бош вазири Нарендра Моди ва Эрон президенти Ҳасан Руҳоний ўртасида бўлиб ўтган музокаралар якунида ташкил этилган. 

Times Now телеканалининг хабар қилишича, Indian Ports Global Private ва Эроннинг Arya Banadar компаниялари Чобаҳор портини ривожлантиришнинг биринчи босқичи юзасидан келишувни имзолаган. Унга кўра, иккита терминал ва 5та мултимодал бандаргоҳ барпо этилади. Ҳиндистоннинг EXIM bankи эса, мазкур битимни молиялаштириш учун 150 млн доллар ажратади. Умуман, Ҳиндистон томони ушбу битим учун 200 млн доллар ажратади. 

Умуман, Ҳиндистон ва Эрон 2015 йили Чобаҳор порти бўйича англашув меморандумини имзолаган эди. Ҳиндистон портни ривожлантириш баробарида Чобаҳор-Зоҳидон-Заранж автойўли воситасида билан Покистонни айланиб ўтган ҳолда, Марказий Осиё минтақасига йўл очади.