Айни вақтда "Манчестер Юнайтед" жамоаси бош мураббийи Луи ван Гаалга ёрдамчи бўлиб турган Райан Гиггз тез орада жамоани тарк этиши мумкин. Бу ван Гаалнинг ўрнига Жозе Моуриньо олиб келинса рўй беради. Бу ҳақда Sky Sports хабар тарқатган.

Манбанинг маълумотига кўра, Моуриньонинг агенти Жорже Мендеш сешанба куни манчестерликлар раҳбарияти билан музокара ўтказиш учун Англияга келади. Яқин вақт ичида Моуриньо "МЮ"нинг бош мураббийи сифатида эълон қилиниши кутилмоқда.

Бундан олдинроқ, португалиялик мутахассис билан "МЮ" раҳбарияти ярим йил олдин келишиб қўйгани, 2015 йил охирида Моуриньо "Челси"ни тарк этгач, у бошқа жамоа таклифини қабул қилмаслиги учун унга 4 млн фунт тўлангани маълум қилинганди.

Ўз футболчилик фаолиятини "МЮ" таркибида ўтказган уэльслик Райан Гиггз жамоа сафида 672та ўйинда майдонга тушиб, 114та гол урган. У жамоа билан 13 марта Англия чемпионига айланган. Шунингдек, 4 марта Англия Кубогида, 8 марта мамлакат Суперкубогида зафар қучган. Гиггз "МЮ" билан 2 марта ЕЧЛ ғолиби бўлган. У 2014 йилда "МЮ" бош мураббийи Дэвид Мойес истеъфога чиқарилишидан кейин вақтинчалик жамоа бош мураббийи вазифасини бажарувчи бўлганди.