Туркия президенти Ражаб Тойиб Эрдўған сешанба куни мамлакатнинг 65-ҳукумати таркибини тасдиқлади. Бироз олдинроқ, Адолат ва Тараққиёт партиясининг раҳбари этиб сайланган Биноли Йилдирим янги ҳукумат аъзолари рўйхатини президентга ҳавола қилганди.

Вазир ва президентнинг учрашуви Анқарадаги президент қароргоҳида бўлиб ўтган.

Ҳукумат таркиби тасдиқлангач, Йилдирим расман Туркиянинг янги бош вазирига айланди.

Ахмат Довутўғли ҳукуматида транспорт, кемасозлик ва алоқа вазири лавозимида ишлаган Биноли Йилдирим 22 май куни партиянинг навбатдан ташқари қурултойида раис этиб сайланган эди. Унинг номзодини 1470 делегатнинг 1405 нафари қўллаб-қувватлади. 

Янги ҳукуматда бош вазир ўринбосарлари Туғрул Туркаш, Меҳмет Шимшек, Нуман Қуртулмуш ўз лавозимларини сақлаб қолишган.  Вейси Қайноқ ва Нуриддин Жаниқли эса бош вазирнинг янги ўринбосарларига айланган.

Шунингдек, Туркия ТИВ раҳбари Мавлуд Човушўғли, ИИВ раҳбари Эфқон Ала, Энергетик ва табиий ресурслар вазири Барот Албайроқ ўз лавозимларида қолган. Ҳукуматнинг янги таркибидаги янги номлар эса қуйидагилар: Молия вазири Нажи Агбал, Мудоффа вазири Фиқри Ишик, Иқтисодиёт вазири Ниҳат Зебекчи, Маданият ва туризм вазири Наби Авжи, ЕИ масалалари бўйича вазир Умар Челик.

Шу ҳафтада ҳукумат дастури эълон қилинади, ундан олдин дастур лойиҳаси парламент тасдиғидан ўтиши керак бўлади.