Ҳиндистонда рекорд даражадаги иссиқдан йўллардаги асфальт эришни бошлади. Иссиқ ҳаво ҳукм сураётган мамлакатнинг ғарбий штатларидан олинган, ушбу ҳолат акс этган кадрларни NDTV канали намойиш қилди.

Гувоҳларнинг айтишича, йўлларда кўп жойларда асфальтга ёпишиб қолган оёқ кийимларини кўриш мумкин, одамлар йўлдан базўр ўтмоқдалар.

Видео олинган Гужарот штатида ҳарорат 36 градусгача кўтарилган. Ражастон штатининг Пхалоди шаҳрида умумҳинд ҳарорат рекорди – 51 градуслик ҳаво ҳарорати қайд қилинди. Метеорологлар ҳароратнинг янада кўтарилишидан огоҳлантиришмоқда, шошилинч хизматлар вентилятор ва кондиционерларнинг ишлаши учун зарур бўлган электр энергиянинг мунтазам ўчиб қолиши билан курашмоқдалар.

Умумий ҳисобда иссиқ ҳаво 13 та штатда кузатилмоқда, бу штатларда 330 млн киши яшайди. Иссиқ уришидан юзлаб одамлар ҳалок бўлгани маълум қилинмоқда. Ҳосили нобуд бўлган ўн минглаб фермерлар очарчиликдан ўтиб олиш учун шаҳарларга кўчиб ўтмоқдалар. Уларнинг кўпи ўз жонига қасд қилмоқда. Ражастон, Махараштра ва Гуджарот штатларидаги дарё, кўл ва сув омборлари қуриб қолган.

Қоида бўйича, май ва июнь ойлари Ҳиндистонда энг иссиқ ойлар ҳисобланади, бу ойларда ҳарорат 40 градусгача кўтарилади. Сўнгра узоқ давом этувчи муссон ёмғирлари келади. Жазирамани енгиб ўтишда ёрдам берадиган ёмғирлар бу йили деярли ёғмаган. Бундай ғайритабиий ҳодисага нима сабаб бўлгани борасида аниқ жавоб йўқ: баъзи метеорологлар бунда Афғонистон ва Покистоннинг иссиқ шамолларини айблашса, бошқалар глобал исиш ва урбанизацияни айбламоқдалар.