Мисрнинг бош суд-тиббиёт эксперти Ҳишам Абдулҳамид 19 май куни Ўрта Ер денгизи ҳудудида ҳалокатга учраган EgyptAir авиакомпаниясига тегишли самолёт бортдаги портлаш туфайли қулаганини исботловчи далиллар топилгани ҳақидаги маълумотни инкор этди.

"Бугун шу ҳақда тарқатилган хабарларнинг барчаси ёлғон ва бу хабарлар суд-тиббиёт экспертизалари натижаларига асосланмаган", дея унинг сўзларини келтиради MENA агентлиги.

Бундан олдинроқ, AP агентлиги EgyptAir  самолётидан топилган қолдиқлар таҳлили портлаш бўлганини кўрсатаётгани ҳақида хабар берганди.

Эслатиб ўтамиз, MS804 рейси билан Париждан Қоҳирага учаётган EgyptAir авиакомпаниясининг Airbus A320 самолёти 19 май тонгида Ўрта Ер денгизи устида радарлардан ғойиб бўлган эди. Унинг бортида 66 киши бўлган. Кейинроқ денгиздан самолёт бўлаклари топилди.