Facebook компанияси раҳбари Марк Цукерберг ўзининг Калифорния штатидаги Пало-Альто номли уйидан кўринувчи манзарани тўсмаслиги учун тўртта турар жойни бузишни талаб қилди. Бу ҳақида Fox News телеканали хабар берди.

Унинг ўзи берган маълумотларга кўра, Цукерберг "шахсий ҳаётига биров аралашмаслиги учун қайғурмоқда". Шундай ҳолатларни четлаб ўтиш мақсадида тадбиркор ҳукуматга мурожаат қилиб, ўз уйи олдидаги иккита бир қаватли ва иккита икки қаватли уйларнинг бузилишига эришди. Уларнинг ўрнига умумий майдони аввалгиларидан 20 фоизга кам бўлган тўртта бошқа уй қуриш режалаштирилган, дея аниқлаштиради телеканал. Бундай режа Цукербергга қанчага тушгани номаълум. 

2013 йилда у ўз уйи атрофидаги уйларни сотиб олишга 30 миллион доллардан ортиқ пул харажат қилган. Fox News берган маълумотларга кўра, Facebook асосчиси 464,5 квадрат метр майдонга эга ҳашаматли уй учун 7 миллион доллар тўлаган. Қароргоҳ нархи бир йилда 12 фоизга ошди. 

Компанияга 2004 йилнинг 4 февралида Марк Цукерберг ва унинг Ҳарвард университетидаги уч нафар курсдоши томонидан асос солинган. Ижтимоий тармоқнинг бир ойлик аудиторияси 1,6 миллиард кишини ташкил этади.