Дунёнинг энг йирик чучук сув манбаи ҳисобланувчи Байкал кўли экологик фожиа остонасида турибди. Мабодо зудлик билан чоралар кўрилмаса, Орол денгизи йўқ бўлганидек, у ҳам дунё харитасидан ўчиб кетиши мумкин. "Известия" газетаси Россия ҳукумати ва етакчи энергетика компанияларидаги манбаларига таянган ҳолда, шу ҳақда бонг урмоқда. 

Энергия вазирлигининг ёпиқ мажлисида келтирилган маълумотларга кўра, Мўғулистон томонидан Селенга дарёси ва унинг ирмоқларида қуришни режалаштирган 3та йирик гидроэлектрстанцияси лойиҳаси амалга оширилса, Байкал кўли экологиясига жиддий салбий таъсир кўрсатади. 

Шу сабаб, бу иншоотларнинг қурилишини бекор қилиш мақсадида Россия Мўғулистонга жиддий таклиф билдириши керак. Чунки Россия шартлари асосида етказиб берилаётган электр энергияси, иқтисодий жиҳатдан Улан-Батор манфаатларига жавоб бермайди. 

Айни вақтда, Хитой банкларидан бири, янги ГЭС лойиҳалари ҳомийларидан бири бўлишга ҳам улгуриб, инфратузилмалар учун 827 млн доллар ажратган. 

Нашрнинг ёзишича, мажлисда Селенга дарёсида ГЭСлар қурилишининг олдини олиш учун турли таклифлар илгари сурилган. Хусусан, Мўғулистонга экспорт қилинаётган электр энергияси қийматини арзонлаштириш чоралари хусусида фикрлар билдирилган.