"Астангенплан" институти вакили Қозоғистон Республикаси Миллий Пантеонининг қурилиши қандай кечишини сўзлаб берди. Унинг сўзларига кўра, 79 миллиард тенге мемориални барпо этиш жараёнида секин-асталик билан ажратилиб борилади - бу бир асргача чўзилиши мумкин, деб хабар беради «NewTimes.kz».

Пантеон қурилишининг ўзига хослиги ва молиялаштириш ишлари ҳақида  «Астанагенплан» лойиҳалаштириш илмий-тадқиқот институти директори ўринбосари Бахтибай Тайталиев сўзлаб берди. 

"Ҳамма мақбаранинг қурилиши 79 миллиард тенгелиги ҳақида гапиради. Нима кераги бор бундай шов-шув кўтаришни? 79 миллиард бюджетдан битта уриниш билан олинмайди-ку!? Бу босқичма-босқич амалга оширилади. Пантеон бир ойда қуриладиган жой эмас. Лойиҳани амалга ошириш 100 йилгача чўзилиши мумкин", - деди Тайталиев. 

У пантеоннинг Остона шаҳридан 17 километр масофадаги Кабанбой ботир мақбараси ўрнига қурилаётганига аниқлик киритди. 

Миллий пантеон учун пойтахт ҳудудига Кабанбой ботир қишлоғи ҳудудидаги ер майдонлари қўшилади. 

Қурилишга биринчи навбатда 2,3 миллиард тенге ажратилиши кўзда тутилмоқда. Бу маблағга Кабанбой ботир мақбарасида капитал таъмирлаш ишлари амалга оширилади.