Жисмоний машқлар саратон келиб чиқишининг олдини оладими?

Иккита йирик доирали тадқиқот бу саволга тасдиқловчи жавоб қайтарди. Олинган янги маълумотлар кўпчиликни спорт билан шуғулланишга руҳлантиради, сайёрамиздаги аҳолининг учдан бир қисми кам ҳаракат ҳаёт тарзини олиб боришини ҳисобга олсак, бу жуда яхши. 

Бундан аввалги тадқиқотлар жисмоний машқларнинг сут безлари, йўғон ичак ва эндометрий саратони хавфини 10-40 фоизга камайтиришини тасдиқлаган. Янги изланишда 19 ёшдан 98 ёшгача бўлган 1,4 миллион нафар кишининг турмуш тарзи ва соғлиғи тўғрисидаги маълумотлар таҳлил қилинди. Натижалар шуни кўрсатдики, жисмоний машқлар билан шуғулланиш яна 10 турдаги саратоннинг пайдо бўлишини олдини олади. Уларнинг орасидан қизилўнгач, ошқозон, сийдик пуфаги ва буйрак саратонлари ўрин олган.  

Тадқиқот натижаларига кўра, спорт билан шуғулланувчи кишиларда қизилўнгач саратонининг ривожланиш хавфи камҳаракат турмуш тарзини олиб борувчиларга нисбатан 42 фоизга кам. Қолган турларида ҳам саратон пайдо бўлиш хавфи 20 ва ундан ортиқ фоизга камайган. Шимолий Каролина университети қошидаги Гиллингс номидаги ижтимоий соғлиқни сақлаш мактаби эпидемиологи - доктор Марилиа Гаммон ҳафтасига атиги тўрт соатини жисмоний машқларга ажратган ҳар бир инсон бундай натижага эришиши мумкинлигини таъкидлади - бу юрак-қон томир касалликларининг олдини олиш учун стандарт маслаҳат. Унинг фикрича, лифтдан воз кечиб, зинадан фойдаланишнинг ўзидаёқ инсон сезиларли натижага эришиши мумкин. 

Шундай экан, ҳар кимнинг соғлиғи ўз қўлида - бунинг учун бироз иродани намойиш этиш талаб этилади.