БМТ Бутунжаҳон гуманитар саммити доирасида учрашув ўтказган Туркия ва Украина президентлари Режеп Тайип Эрдўған ҳамда Петр Порошенко, украин полициячилари Туркия ҳудудидаги машғулотларда қатнашишига келишиб олишган.  Бу ҳақда, Порошенко фейсбукдаги саҳифасида маълум қилган.

«Украина ҳуқуқ-тартибот идораларининг ўртача 3 минг нафар ходими яқин орада Туркияда машғулотларда қатнашади, тренингларда иштирок этади. Бу икки мамлакат полициячилари ўртасидаги энг самарали ҳамкорликдир», — деб ёзган Украина президенти.

Томонлар, шунингдек, украинларнинг Туркияда кўпроқ қолишига имкон бериш мақсадида, миллий визалар муддатини 90 кунгача оширишга келишиб олган. 

Бундан аввал, Порошенко Туркия ҳукумати, Украинага 5та ҳарбий кўчма госпитал тақдим этгани ҳақида маълум қилган эди. Улар, аксилтеррористик амалиётлар ўтказилаётган Украина шарқига юборилади.