Япониянинг таълим, маданият, спорт, фан ва технологиялар вазирлиги компьютерда дастурлашни бошланғич синфларда ўтилиши шарт бўлган фанга айлантиришга қарор қилди. Бу ҳақда The Japan News хабар бермоқда.  

Ушбу ташаббус 2020 йилда кучга киради. 2021 йилдан ўрта мактабларда ҳозирдагидан кўра ҳажмлироқ дастурлаш фани ўтилади. 2022 йилда Япония ҳукумати ушбу дарсни мактаб дастурининг ўқитилиши шарт бўлган фанига айлантиради. Ҳозирча эса бошланғич синфлар ўқувчилари бу фанни қўшимча дарс сифатида ўрганишлари мумкин.

Нашрнинг таъкидлашича, Япониянинг баъзи префектураларида бу фан аллақачон ўқитилмоқда. Ўқувчилар дастурлаш дарсларини катта қизиқиш билан ўрганмоқдалар. 

Ушбу фаннинг мактаб дастурига киритилишида асосий муаммо ўқитувчиларда тегишли тажриба ва билимларнинг йўқлиги бўлмоқда. Бу муаммони енгишда IT-компаниялари ва жамоатчилик ташкилотлари томонидан ташкил этиладиган маърузалар ёрдам бериши айтилмоқда.