"Ўзэкспомарказ" кўргазма мажмуасида 31 майдан 3 июнга қадар қишлоқ хўжалик техникасининг Uzbekistan Agrotech Expo-2016 ва Uzbekistan Agromash Expo-2016 номи остида иккита махсус кўргазмаси бўлиб ўтади. Бу ҳақида «Ўзвиносаноат-холдинг» компаниясининг матбуот хизмати маълум қилди.

Кўргазмада замонавий технология ва ускуналарнинг етакчи халқаро ва маҳаллий ишлаб чиқарувчилари, шунингдек республика минтақаларининг ижтимоий-иқтисодий дастурларига киритилган фермер хўжалиги, агрофирмалар, тадбиркорлар иштирок этишади. 

Кўргазмадаги иштироки доирасида аграр саноати учун технология ва ускуналарни олиб киришни амалга оширувчи компаниялар кўргазма савдосида тузилган шартномаларни бажаришда қатор имтиёзлардан фойдаланишади. Жумладан, мини-технологиялар ва компакт ускуналар намуналарини расмийлаштириш солиқ тўловларисиз амалга оширилади. 

Шуни таъкидлаш жоизки, Uzbekistan Agromash Expo-2016 кўргазмасида тузилган шартномалар асосида Ўзбекистоннинг хўжалик субъектларига  қишлоқ хўжалик техникаси, машиналар ва ускуналарни тендер савдоларсиз қўлга киритишга рухсат берилган.