“Соғлом она ва бола йили” Давлат дастури ижроси доирасида “Соғлом авлод учун” халқаро хайрия фонди ва “Ўзбекистон темир йўллари” акциядорлик жамияти ҳамкорлигида ташкил этилган “Саломатлик поезди” Қашқадарё вилояти аҳолисини тиббий кўрикдан ўтказмоқда. Бу ҳақда “ЎзА” хабар бермоқда. 

  Акция доирасида Деҳқонобод тумани маркази ва Оқработ қишлоғида 900 га яқин киши чуқурлаштирилган тиббий кўрикдан ўтказилди.

– Юрак қон-томир касаллиги билан оғриганман, – дейди деҳқонободлик Назира Холиқова. – Тажрибали шифокорлар тиббий кўрикдан сўнг саломатлигим учун зарур тавсиялар, дори-дармон берди. Бундай хайр-саховатнинг ташаббускори бўлган Президентимиздан  миннатдормиз.

Тадбир доирасида ижтимоий кўмакка муҳтож аҳоли ва ногиронларга, тиббий-ижтимоий муассасаларга қиймати 1 миллиард 317 миллион 376 минг сўмлик озиқ-овқат маҳсулотлари, ногиронлик аравачалари, кийим-кечак, дори-дармон, тиббиёт анжомлари, санитария-гигиена воситалари, ўқув қуролларидан иборат мурувват ёрдами кўрсатилади.