"Толибон" ҳаракати вакили ташкилот раҳбари мулла Ахтар Мансур АҚШ дрони зарбаси туфайли ҳалок бўлгани ҳақидаги маълумотни тасдиқлади. Бу ҳақда РИА Новости агентлиги хабар тарқатди.

21 май куни мулла Ахтар Муҳаммад Мансур Покистоннинг Аҳмад-Вали шаҳридан жануби-ғарбда автомобилда ҳаракатланаётганида америкалик ҳарбийлар томонидан бир йўла бир неча учувчисиз қурилма воситасида ўтказилган амалиёт натижасида йўқ қилинганди.

Расмий Исломобод АҚШнинг бу ҳаракати Покистон суверентетига зид эканини таъкидлаган. Шунингдек, Покистон томони мулла Мансурнинг ўлимини тасдиқлай олмаслигини билдирганди. Покистон ТИВ воқеа жойида Вали Муҳаммад исмли шахснинг паспорти топилганини, у шу куни Эрондан Покистонга ўтгани ҳақида маълум қилди.

Ахтар Муҳаммад Мансур 2015 йилнинг июлида, "Толибон"нинг аввалги етакчиси Муҳаммад Умар 2013 йилдаёқ ҳалок бўлгани ҳақидаги маълумот ошкор бўлганидан кейин унинг ўрнини эгаллаганди.