Япония бош вазири Шиндзо Абэ Хонсю оролидаги Миэ префектурасида жойлашган Исэ ибодатхонасига келган G7 давлатлари раҳбарларини кутиб олди ва саммит ўз ишини бошлади.

Япония 2008 йилдан буён илк марта "Катта еттилик" саммитига мезбонлик қилмоқда. 2008 йилги саммит Хоккайдо оролида ўтказилганди. Бу йилги саммит 26-27 май кунлари ўтказилади.

Саммитга АҚШ, Канада, Германия, Буюк Британия, Италия ва Франция раҳбарлари етиб келишди ва Кашикоджима оролчасидаги меҳмонхонага йўл олишди.

Ёпиқ тарзда ўтказиладиган музокараларда саммит иштирокчилари террорчилик ва кибержиноятчилик, глобал иқтисодиёт масалалари, Хитой таъсир доирасининг тобора ортиб бораётгани, Украина, Яқин Шарқ атрофидаги воқеалар, қочқинлар муаммоси, иқлим ўзгариши ҳамда Шимолий Корея атрфидаги ядровий масалаларни муҳокама қилишлари кутилмоқда.

Саммит якунларига бағишланган декларация 27 май куни эълон қилинади.

Маълумотларга кўра, Обама ташрифи давомида Хиросима шаҳрини зиёрат қилади. “Бу тарихий воқеа бўлиши кутилмоқда. Обама — 1945 йилдаги атом бомбардимонидан сўнг Хиросимага ташриф буюрган биринчи Америка президентига айланиши мумкин”, деб ёзади NHK нашри.

Бундан аввалроқ Обама 200 мингга яқин кишининг ёстиғини қуритган Хиросима ва Нагасаки фожиалари учун кечирим сўрамайдиган бўлгани ҳақида хабарлар берилганди.

Аммо, шу билан бирга Япония ҳукумати учун атом бомбаси қурбонига айланган шаҳарларнинг бирига Америка президентининг ташриф буюриши катта воқеликлиги таъкидланмоқда.