Испаниянинг Барселона шаҳрида 3 кундан буён уйсизларни ҳимоя қилиб уюштирилган намойишлар ўтказилмоқда.

Шаҳардаги Banc Expropiat банкининг ташландиқ биносида 2011 йилдан буён яшаб келаётган уйсизларни чиқариб юбориш ҳаракатларига қарши бошланган намойишларда 1000 нафардан ортиқ киши қатнашган.

El Mundo нашри хабар беришича, 26 майга ўтар кечаси ўтказилган намойиш натижасида аввалгиларидан фарқли равишда 11 киши жароҳатланган, улар орасида полициячилар ва журналистлар ҳам бор. Полициячилар намойишчиларни Революсио де Грасия майдонига киритмаганида, улар шиша идишлар ва тошлар улоқтиришган, чиқинди идишлари ва ғилдиракларни ёқишган ҳамда кўчада баррикадалар қуришган.

Бундан олдин ҳам Барселонада шундай намойишлар ўтказилган, 2014 йили «Кан Виес»нинг эски биносида яшовчи уйсизлар қувғин қилинганида аҳолининг норози вакиллари кўчаларга чиққанди.