Сурия армияси бўлинмалари Пальмира тарихий-археологик мажмуаси яқинида тинч аҳолининг ўнлаб вакиллари жасадлари кўмилган оммавий қабрни аниқлади. Марҳумлар ҳудуд ИШИД томонидан эгаллаб олинган вақтда жангарилар томонидан ўлдирилган. Бу ҳақда САНА агентлиги хабар тарқатди.

Манбанинг маълумотига кўра, қабрдан 31 кишининг жасади топилган, уларнинг барчаси жангарилар томонидан қийноқлар оқибатида ҳалок бўлган. Улар орасида аёллар ва болалар жасадлари бор. Баъзи жасадлар бошсиз дафн қилинган.

1 апрель куни Суриянинг Тадмор шаҳри шимоли-шарқидаги Ал-Жахизия мавзесида жангарилардан жафо чеккан аҳоли вакиллари кўмилган оммавий қабр аниқланган, бу қабрдан 40 кишининг жасади топилганди.

Пальмира шаҳри март ойи охирида озод этилган. Шундан сўнг шаҳарни миналардан тозалаш ишлари олиб борилган, бу ишлар 21 апрель куни якунланган.

Йил давомида Ироқнинг жангарилардан озод этилган Синжор ва Рамади шаҳарларида ҳам оммавий қабрлар топилганди.