Россия мусулмонлар диний бошқармаси томонидан "Закот" хайрия жамғармаси кўмагида 28 май куни Бутунроссия донорлик акцияси ўтказилади ҳамда Халқаро болаларни ҳимоя қилиш кунига бағишланади, деб хабар берилди Москва мусулмонлар диний бошқармасида РИА “Новости” ахборот агентлигига. 

Келаётган жума намозида масжидларда имомлар ибодат қилувчиларни донорлик акциясига жалб қилиш мақсадида у ҳақда маълумот берадилар.

"Тадбир Москвада қон қуйиш станциясида бошланади, сўнгра Россиянинг йирик шаҳарлари ва вилоятларида давом этади. Ташкилотчилар барчани тадбирда иштирок этишга таклиф қилади, чунки тиббий эҳтиёжлар учун етарлича қон билан таъминлашга мамлакатда 1000 кишига камида 40 нафар донор бўлиши керак. Россияда бу борадаги ўртача кўрсаткич 1000 кишига 14 донорни ташкил қилмоқда. Назарий жиҳатдан аҳолининг 10-15 фоизи донор бўлиши мумкин, бироқ ҳақиқатда қон топширувчилар ўнлаб маротаба камроқдир", дейилмоқда хабарда.

Донорлик акциясининг вазифалари "ёшлар ўртасида қон донорлигини оммалаштириш, донорлик йўналиши доирасида волонтёрлик фаолиятини фаоллаштириш" ҳамда "жамоатчилик эътиборини ушбу мавзуга жалб қилиш"дан иборат. Маълум қилинишича, бу акция иккинчи маротаба ўтказилади.