Жанубий Корея республикаси ҳарбий денгиз ва ҳарбий ҳаво кучлари хизматчилари, мамлакат шарқий соҳилларида қўшма ўқув машғулотлари ўтказди, деб хабар қилмоқда Ренхап агентлиги. Ундан кўзланган мақсад, Шимолий Корея томонидан пайдо бўладиган эҳтимолий таҳдидларга қарши амалий кўникмалар ҳосил қилишдир. 

Агентлик маълумотларига кўра, машғулотларда Жанубий Корея ҳарбий денгиз кучларининг Aegis ("Ижис") ракеталарга қарши мудофаа тизимига эга кемасидан ташқари яна 10 та ҳарбий кема ва патруль самолёти қатнашган. Машғулотлар чоғида, рақиб денгиз кемаларига қарши ҳужум қилиш амалиётлари ўзлаштирилган. 

Корея яриморолидаги вазият КХДР томонидан 6 январь куни тўртинчи ядро синови, 7 февралда янги авлод баллистик ракетаси парвози амалга оширилгач таранглашган эди. Расмий Сеулнинг фикрича, шимолликлар бу ракета ёрдамида 12 минг километргача масофада жойлашган нишонга ядро зарбаси бера олади.