Бишкекда ўтган Россия ва Қирғизистон ташқи ишлар вазирликлари ходимлари ўртасидаги учрашувда Қирғизистон ТИВ Россия томонидан муҳожирларнинг “қора рўйхати”ни қисқартиришни сўради. Бу ҳақда Қирғизистон ТИВ матбуот хизмати маълум қилган.

“Қора рўйхат”га киритилган шахслар Россиянинг муҳожирлик тўғрисидаги қонунчилигини бузганлар бўлиб, Қирғизистон фуқаролари ҳисобланди.

Учрашув Қирғизистон ТИВнинг консуллик хизмати департаменти раҳбари Эркин Асангулов ва РФ ТИВ консуллик департаменти раҳбари ўринбосари Андрей Фролов ўртасида бўлиб ўтди. Томонлар Россиядаги қирғизистонлик меҳнат муҳожирларининг қолиш ва чиқиш масалаларини муҳокама этишди.

Бундан ташқари, 16 ёшга тўлмаган қирғизистонлик фуқароларнинг РФ чегарасидан ўтказишнинг техник томонларига ҳам тўхталиб ўтилган. Россия томони бу масалада ҳам ҳамкорлик қилишга тайёр эканлигини билдириб ўтган.