Юқоричирчиқ туман ҳокимлигидан рўйхатдан ўтиб, “Имкон Интер Бизнес” корхонасини ташкил қилган Учқун Исломов (исм-фамилиялар ўзгартирилган) Тошкент вилоятининг Юқоричирчиқ, Қуйичирчиқ, Оққўрғон, Бўка ҳамда Пискент туманлари аҳолисига имтиёзли нархларда кўмир етказиб бериш учун “Ўзбеккўмир” ОАЖ билан шартнома имзолайди. Бу ҳақда “Ҳуқуқ” нашри ёзмоқда.

2012 йилда тузилган шартномага мувофиқ, “Имкон Интер Бизнес” корхонаси мутасаддилари “Ўзбеккўмир” ОАЖдан 2014 йилгача 3 млрд. 392 млн. 457 минг сўмлик кўмирни имтиёзли нархда сотиб олишади-ю, шартномада кўрсатилган ҳудудлардаги аҳолига етказиб беришни хаёлларига ҳам келтиришмайди. Барча маҳсулотлар терговда шахсини аниқлашнинг имкони бўлмаган номаълум шахсларга сотиб юборилади. “Ўзбеккўмир” ОАЖга топширилган ҳисоботлар эса сохталаштирилиб, барча маҳсулотлар имтиёзли нархларда сотилган қилиб кўрсатилади.

Корхона фаолияти давомида У.Исломов жиноий шериги Тўлқин Эшматов билан сотувдан тушган нақд пулларни банк муассасасига топширмагани ҳам маълум бўлди. Бу кимсалар 1 млрд. 809 млн. 502 минг сўм нақд пулни банкка кирим қилмасдан, ўз манфаатлари учун совуриб юборганликлари аниқланди.

У.Исломов ҳамда Т.Эшматовга ҳам суднинг ҳукми билан тегишли жазо тайинланди.