Туркия бош вазири ўринбосари Нўъмон Куртулмуш, мамлакат ЕИга 3чинчи минг йилликда аъзо бўлишини "шармандали" деб ҳисоблашини маълум қилди. РИА Новости агентлигининг хабарига кўра, у Туркия паламентида шундай баёнот берган. 

«Агар кимдир, Туркиянинг ЕИга аъзо бўлиши 3000 йилгача давом этадиган жараён деб ҳисобласа, бу Туркия учун эмас, балки бундай фикрларни илгари сураётганлар учун шармандалидир», — деган Куртулмуш.

Юқори лавозимли мулозимнинг сўзларига кўра, европалик сиёсатчилардан, 30 йилдан кейин, ҳозирги Иттифоқ билан нималар рўй беради, деб сўраш лозим. 

«Биз, визаларни либераллаштириш бўйича зиммамизга олган мажбуриятларимизни бажарамиз. Бироқ, қайд этишни истардимки, Туркия ЕИга умуман боғлиқ эмас», — деган бош вазир ўринбосари.

22 май куни Буюк Британия бош вазири Дэвид Кэмерон, музокараларнинг бундай секин боришида Туркия ЕИга 3000 йилдан аввал аъзо бўла олмайди, деган фикрларни билдирган эди. 

Кэмероннинг эслатишича, Британия Иттифоққа аъзо барча давлатлар сингари янги аъзо қабул қилинишига қарши вето ҳуқуқидан фойдалана олади.