Британия қироличаси Елизавета II нинг никоҳ ва тож кийдириш маросими кўйлаклари Лондондаги Букингем саройида кўргазмага қўйилади, деб хабар беради Daily Express. Ҳар иккала либоснинг муаллифи – машҳур кутюрье, сэр Норман Хартнеллдир.

Либослар «Моделлаштириш ҳукмронлиги: қироллик гардеробидаги услубнинг 90 йиллиги» кўргазмасининг экспонатига айланди. Кўргазмага  23 июлдан 2 октябргача ташриф буюриш мумкин.

Бу 2016 йилда Елизавета II услубига бағишлаб ўтказиладиган учта кўргазмалардан биридир. Барча кўргазмалар қироличанинг расмий қароргоҳларида ўтказилади. 
21 апрель куни Эдинбургдаги Холируд саройида биринчи кўргазма ўз ишини бошлаган эди. 17 сентябрда эса яна бир кўргазма Виндзор қасрида ишга тушади.  Умумий ҳисобда омма эътиборига 150 та либос намойиш этилади.