Россияга бюджет синфидаги Ravon R2 хэтчбекининг илк партияси юборилгани хусусида хабар қилинган эди. "Ravon" савдо белгисининг Россиядаги ваколатхонаси хабар қилишича, "Ravon R2" машиналари ортилган автокарвонлар май ойида Россия ҳудудига кириб келган. 

Айни вақтда, «Ravon Russia» маълумотларига кўра, автовозлар Воронеждаги чўзилиб кетган божхона расмийлаштируви тугашини кутиб турмоқда. 

Эслатиб ўтамиз, автовозларда етказиб беришга кўпроқ вақт сарфлансада, темир йўллар нархининг қимматлашуви туфайли, шундай чорага қўл урилган эди. 

Ўзбекистондан келтирилувчи Ravon R2 нинг илк партияси буюртма бўйича сотиб бўлингани хабар қилинганди. Унга кўра, Москва ҳамда воронежлик мижозлар ўз «Ravon R2»ларини биринчилардан бўлиб қабул қилишади. Улар автомобиль учун 100 фоизлик олдиндан тўловни амалга оширишган. 

Бугунги кунда, Россияда «Ravon» брендининг 19 та дилерлик маркази фаолият юритади. Яқин орада компания автомарказлари сонини 30 тагача етказишни режалаштирмоқда.