Россия Федерацияси президенти Владимир Путиннинг сўзларига кўра, расмий Москва, АҚШ ракеталарга қарши мудофаа тизими иншоотларининг Руминияда барпо этилишига қарши чоралар кўришга мажбур бўлади, деб хабар қилмоқда РИА «Новости».

Путиннинг қайд этишича, АҚШ «бир томонлама асосда ракеталарга қарши мудофаа тизими шартномасидан чиқиб», халқаро хавфсизликнинг фундаментал асосларига зарба берди. 

«Бизга ҳеч ким қулоқ солмаяпти. Музокаралар олиб боришни ҳам истамаяпти. Умумий гаплардан бошқа ҳеч нарсани айтишаётгани йўқ. Улар бу тизимлар Россияга қарши қаратилмагани, Россия хавфсизлигига таҳдид солмаслигини таъкидлашдан нарига ўта олишмаяпти. Маълумки, дастлаб гап Эрон таҳдиди, Эрон ядро дастури ҳақида сўз борган эди. Эндиликда Эрон ядро дастури ҳам тугатилди», — деган Путин.