Ироқ қўшинлари ва сунний кўнгиллилари Бағдоддан 50 километр узоқликдаги Ал-Фаллужа шаҳри яқинида ИШИД жангариларининг илк мудофаа чизиғини ёриб ўтди. Ҳужумда артиллерия кучлари ва танклар иштирок этмоқда. Шунингдек, юқоридан авиация кучлари кўмак бермоқда. Бу ҳақда Al Arabiya телеканали хабар тарқатган.

Манбанинг маълумотига кўра, айни вақтда шаҳар уч томондан ўраб олинган.

Франс пресс агентлигининг Ироқ армияси қўмондонларидан бирига асосланиб хабар беришича, ҳарбийларнинг бир қисми шаҳарга кирган.

Ал-Фаллужани озод этиш бўйича ҳарбий ҳаракатлар 1 ҳафта олдин бошланган, шу вақтгача шаҳар атрофидаги қишлоқларни жангарилардан тозалаш ишлари олиб борилган ва марралар мустаҳкамланган.

Ал-Фаллужа 2014 йили ИШИД Ироқ ҳудудида эгаллаб олган илк шаҳар ҳисобланади.

Бағдоддан террорчиларга қарши кураш махсус кучларининг 5 минг нафар жангчиси етиб келган.

Фаллужада операция бошлангунича шаҳарни тарк этишга улгурмаган 50 минг атрофида аҳоли борлиги айтилган. ОАВ хабарларига кўра, бу аҳоли очликдан азият чекмоқда.