Россия президенти Владимир Путин иштирокида ўтказилган иқтисодий кенгаш президиуми мажлисида Стратегик ишланмалар маркази раҳбари Алексей Кудрин, иқтисодиётни ривожлантириш мақсадида геосиёсий кескинлик даражасини пасайтиришни тавсия этди, деб ёзмоқда «Ведомости» газетаси.

Кудриннинг фикрича, турли амбициялардан воз кечиш ғарб давлатларига технологик ва иқтисодий маънода етиб олиш имконини беради. 

Бироқ, нашрнинг ёзишича, давлат раҳбари собиқ молия вазири таклифини рад этиб, Россия айрим жиҳатларда тараққий этган мамлакатлардан ортда қолишига қарамай, "суверенитетини сота олмаслиги"ни таъкидлаган. Бунда Путин умрининг охиригача, давлат мустақиллиги ва эркинлигини ҳимоя қилишга ваъда берган. 

«Биринчи бўлиб Россия бошлагани йўқ», — деган давлат раҳбари. Бироқ, унинг қайд этишича, «кескинликнинг ўта таранглашувига йўл қўймаслик ҳамда фитналарга учмаслик зарур».

Апрель ойида президент матбуот котиби Дмитрий Песков, Кудрин тўғрисида фикр билдириб, Кремль маъмурияти уни дунёнинг энг етакчи молия мутахассисларидан бири деб ҳисоблашини таъкидлаган эди. 2000-2011 йилларда Россия молия вазири бўлган Кудрин, мамлакат вазирлар маҳкамасининг энг яхши аъзоларидан бири дея эътироф этилган.