2016 йил 27 май куни Вазирлар Маҳкамаси ҳузуридаги Дин ишлари бўйича қўмита раиси О. Юсупов, Ўзбекистон мусулмонлари идораси раиси У. Алимов ва Адлия вазирлиги жамоат, нодавлат нотижорат ва диний ташкилотлар бошқармаси бошлиғи Х.Мелиевлар Имом Бухорий халқаро марказига ташриф буюрдилар.
Мазкур ташриф доирасида Марказдаги шарт-шароитлар, олиб борилаётган ишлар юзасидан тингловчилар билан суҳбат олиб борилди. 
Муфтий Усмонхон Темирхон ўғли ҳазратлари ўз нутқи давомида барча тингловчи имом-хатибларни яқинлашиб келаётган давлатимиз мустақиллигининг 25 йиллиги ва муборак рамазон ойи билан ва ушбу марказда иккинчи бор ўзлариниг касбий малакалари ва диний ҳамда дунёвий билимларини янада юқори савияга кўтаришга келганлари билан қутлаб, уларга зарур ва қимматли тавсиялар берди. Шу билан бир қаторда имом-хатибларга идора тарафидан барча имкониятлар яратилиши ва келгусида уларнинг ҳаёт даражаси ва фаровонлигини ошириш бўйича олиб борилаётган ишлар ҳақида гапириб ўтди.
Дин ишлари бўйича қўмита раиси юртимизда дин ва давлат ўртасидаги муносабатлар, мустақиллик даврида эришилган ютуқлар, ўтган даврларда дин ва диний ходимларга бўлган муносабатлар, жамиятни, мўъмин-мусулмон халқни дин-афюндир деган бузғунчи ғоялар билан заҳарлашга, қанчадан-қанча мадраса, масжид, миллий ва маънавий меросимизни йўқ қилишга уринишлар бўлганлиги ҳақида гапириб ўтди.

Мазкур суҳбатда давомида Адлия вазирлиги бошқарма бошлиғи ҳам барча тингловчиларни қўшалоқ байрамлар билан табриклаб, бугунги кунда ДИҚ ва ЎМИ тизимидаги барча олиб борилаётган ишлар Адлия вазирлиги билан ҳамжиҳатликда ўтаётганлигини билдириб ўтди.
Мазкур суҳбат сўнгида ташриф буюрган меҳмонлар ва тингловчи имом-хатиблар билан Марказ фаолиятига оид ва бошқа масаларларда фикр мулохазалар алмашилинди.

Ўзбекистон Республикаси Адлия вазирлиги матбуот хизмати.