АҚШ миллий хавфсизлик агентлигининг собиқ ходими Эдвард Сноуден, махфий хизматлардаги муаммоларга эътибор қаратиш билан Америка жамоатчилигига хизмат қилган бўлса-да, суд олдида қилмиши учун жавоб бериши лозим, деб ҳисобламоқда Америка собиқ бош прокурори Эрик Холдер.

Америка телевидениесида чиқиш қилган Холдернинг қайд этишича, Сноуден томонидан ошкор қилинган маълумотлар, АҚШ разведка хизматларига путур етказган, шу боисдан ҳам бу ишни суд кўриб чиқиши лозим. 

Аммо Холдернинг сўзларига кўра, суд мажлиси қачондир амалга ошадиган бўлса ҳам, у Сноуден қилмишининг ижобий ва салбий жиҳатларини эътиборга олиши лозим бўлади. 

Эслатиб ўтамиз, Сноуден Америка миллий хавфсизлик агентлиги фаолиятига оид катта ҳажмдаги махфий маълумотларни жаҳондаги етакчи ОАВга топширган эди. Бу маълумотларнинг ошкор бўлиши эса, халқаро можароларга сабаб бўлди. Хусусан, Сноуден маълумотларида, агентлик дунёнинг 35 давлати раҳбарлари, жумладан ГФР канцлери Ангела Меркелнинг телефон орқали суҳбатларини ҳам тинглагани тўғрисида ахборотлар мавжуд эди. 

Эдвард Сноуден 2013 йили Россияга келиб, бу ерда вақтинчалик бошпана топди. 2014 йил 1 августидан унинг муддати 3 йилга узайтирилди. Бундан ташқари, Сноуденга вақтинчалик яшаш рухсатномаси ҳам берилди.