Британиялик таниқли физик олим Стивен Хокинг Дональд Трампнинг бу қадар машҳурлашиб кетиши ҳақидаги саволга жавоб беришда қийинчиликка дуч келди. Олим АҚШ президентлиги учун Республикачилар партиясидан номзод бўлган миллиардер сиёсатчини "демагог" (сафсатабоз) деб атаган.

"У демагог. У ўз сафсаталари билан оломоннинг онгини эгаллаган", дея Трампни таърифлаган Хокингнинг сўзларини келтиради RT нашри.

Ўтган ҳафтада Трамп президентликка номзодини кўрсатиш учун зарур овозга эга бўлганди. Трамп 1238 делегат овозига эга бўлган ва бу белгиланган миқдордан бир овоз кўпдир.

Демократлар партиясидан президентликка номзодлик учун курашаётган Ҳиллари Клинтон праймеризда ғалаба қозониш учун сенатор Берни Сандерс билан курашни давом эттирмоқда. Кузатувчиларнинг фикрича, у келгусида ғалаба қозонади ва номзодини президентликка кўрсатади.  

АҚШда президентлик сайлови ноябрда бўлиб ўтади.