Мексика ғарбида жойлашган Мичоакан штатида 11 июль тунда бензовоз ва йўл танламас юзма-юз тўқнашиб кетди. Маҳаллий қутқарув хизмати вакилларининг маълум қилишларича, автоҳалокат оқибатида ҳалок бўлганлар сони саккиз нафарни ташкил этади. Қурбонлар орасида уч нафар ёш бола ҳам бўлган ва уларнинг барчаси енгил машина салонида бўлишган. Етти нафари воқеа жойининг ўзида ҳалок бўлган, бир киши эса Уруапан шаҳрида шифохонада вафот этган.
Ҳуқуқни муҳофаза қилиш органлари ходимлари маълум қилишича, фожиага сабаб бензовознинг тормози ишламай қолиши бўлган. У йўл танламас билан тўқнашиб кетгач, йўлдан чиқиб кетган ва бир оздан сўнг ёна бошлаган. Юк машинаси ҳайдовчиси воқеа жойидан яширинган. У қидирувга берилган.