2016 йилнинг 8 июн куни Ўзбекистон Республикаси Президентининг “XII Халқаро ўзбек пахта ва тўқимачилик ярмаркасини ташкил этиш ва ўтказиш чора-тадбирлари тўғрисида”ги Қарори қабул қилинди. Унга кўра, жорий йилнинг 12–13 октябрь кунлари Тошкент шаҳрида XII Халқаро ўзбек пахта ва тўқимачилик ярмаркаси бўлиб ўтади.

Таъкидлаш жоизки, 2005 йилда Президентимиз ташаббуси билан ташкил этилган ушбу ярмарка дунё иқтисодий ҳаётидаги муҳим тадбирлардан бирига айланди. Ҳозирда мазкур ярмарка жаҳондаги кўплаб етакчи ишлаб чиқарувчиларни ўзига жалб қилмоқда. Пахта толаси ва тўқимачилик маҳсулотларини сотиш бўйича бозор механизмларини янада ривожлантириш, ўзбекистонлик ишлаб чиқарувчилар ҳамда уларнинг хорижлик ҳамкорлари ўртасидаги муносабатларни янада мустаҳкамлашга кўмаклашмоқда. 

Ушбу ярмарканинг ташкиллаштиришда Халқаро пахта ассоциацияси, Пахта бўйича халқаро консультатив қўмитаси, “Cotton Outlook” халқаро агентлиги ва Халқаро тўқимачилик маҳсулотлари ишлаб чиқарувчилар федерацияси сингари нуфузли ҳалқаро ташкилотлар доимий ҳамкорлик қилиб келади.

Жорий йилги ярмарка “Ўзпахтасаноатэкспорт” холдинг компанияси, “Ўзбекенгилсаноат” давлат акциядорлик компанияси, Ўзбекистон Республикаси Ташқи иқтисодий алоқалар, инвестициялар ва савдо вазирлиги, Ўзбекистон қишлоқ ва сув хўжалиги вазирлиги, Ўзбекистон Республикаси товар-хомашё биржаси, Ўзбекистон “Сифат” маркази ва бошқа тегишли тузилмалар кўмагида ташкил этилади. 

Асосий тадбирлар “Ўзэкспомарказ” компаниясининг кўргазмалар залида ўтказилади. Халқаро ўзбек пахта ва тўқимачилик ярмаркасидаги конференциялар ҳамда мулоқотларда жаҳон пахта ва тўқимачилик бозорининг етакчи вакиллари томонидан Ўзбекистон ва дунёда пахта толаси ишлаб чиқариш, савдо ва инвестицион ҳамкорликни кенгайтириш каби кўплаб масалалар муҳокама қилиниши ва ўзаро манфаатли олди-сотди шартномалари имзоланиши кутилмоқда.

Ярмарка ҳақидаги маълумотлар билан www.cottonfair.uz сайти орқали танишиш мумкин.

"Ўзпахтасаноатэкспорт" холдинг компанияси Матбуот хизмати.