Ўзбекистон Республикаси Вазирлар Маҳкамасининг жорий йил 31 мартдаги “Дон хавфсизлиги тўғрисидаги умумий техник регламентни тасдиқлаш ҳақида”ги қарорида соҳага доир ягона талаблар белгиланди. Бу ҳақда “ЎзА” хабар бермоқда.   

Қарорга кўра Ўзбекистон ҳудудида муомалага чиқариладиган дон, уни етиштириш, сақлаш, ташиш, муомалага чиқариш, утилизация қилиш жараёнларига қўллаш ва бажариш учун ягона ва мажбурий бўлган хавфсизлик талаблари қабул қилинди. Донни тамғалаш ва қадоқлаш бўйича муайян мажбурий талаблар ўрнатилди. 

Янги техник регламентга кўра, эндиликда бу стандартларнинг талаблари умумлаштирилиб, 29 турдаги озиқ-овқат ва озуқа ем экинларига қўлланилади. Техник жиҳатдан тартибга солиш бўйича халқаро норматив ҳужжатларга мос бу регламент тадбиркорларга бир қатор енгилликлар яратади. Мазкур техник регламент 2017 йилнинг 11 октябридан кучга киради.

Техник регламент асосида тартибга солинадиган маҳсулотлар сирасига қаттиқ ва юмшоқ буғдой, жавдар, тритикале, сули, арпа, тариқ, шоли, маккажўхори, ловия, нўхат, ясмиқ, мош, бурчоқ, соя, рапс, зиғир, ерёнғоқ, кунжут, пахта, хантал ва бошқалар киради. Шу каби  озиқ-овқат ва озуқа ем мақсадларига мўлжалланган донда токсик элементлар, бензопирен, пестицидлар, радионуклидлар, зарарли аралашмалар ва дон зарарланганлигининг чегаравий рухсат этиладиган даражалари, қадоқлашга бўлган санитария-гигиена талаблари ҳам ўз ифодасини топган.