Ўзбекистон махсус хизматлари Туркия расмийларидан Ўзбекистон фуқароларининг Истанбулдаги терактга алоқадорлиги ҳақида ҳеч қандай хабар олмаган. Бу ҳақда Ўзбекистон ҳуқуқни муҳофаза қилиш органларидаги манбага асосланиб, Спутник хабар қилди.

Бундан олдинроқ Рейтер агентлиги ва бошқа бир қатор нашрлар Истанбулдаги теракт ижрочилари Россия, Қирғизистон ва Ўзбекистон фуқаролари бўлгани ҳақида хабар тарқатди.

«Туркия томонидан биз ҳеч қандай билдириш келиб тушмади. Агар маълумот келса, биз белгиланган тартибда иш олиб борамиз», — дейилган манба маълумотида.

29 июнга ўтар кечаси Истанбул шаҳридаги Отатурк номли халқаро аэропортга 3 нафар террорчи уюштирган ҳужум оқибатида 43 киши қурбон бўлди, 239 киши жароҳатланди. 

Туркия бош вазири Биноли Йилдирим бу теракт ортида ИШИД тургани ҳақида маълум қилди.

Бугун Туркия махсус хизматлари шаҳарнинг 16 нуқтасида ўтказилган рейдлар воситасида терактга алоқадорликда гумон қилиб, 13 кишини қўлга олди. Улардан 4 нафари хорижлик.

Yeni Safak нашри Истанбул терактларини чеченистонлик террорчилар уюштирган бўлиши мумкинлиги ҳақида хабар тарқатганди. Хабарда аэропортда ўзини портлатганлардан бири "Имарат Кавказ" гуруҳи вакили Аҳмед Чатаев экани айтилган.

DHА агентлиги эса террорчилардан бири келиб чиқиши чечен бўлган Россия фуқароси Осман Вадинов бўлгани, у Туркияга Суриянинг Раққа шаҳридан келгани ҳақида ёзди.