АҚШдан нефть экспорт қилиш сўнгги юз йилда энг юқори кўрсаткичга етди

Иқтисодиёт 07 Июль 2016 5262

АҚШ, нефть экспортига нисбатан эмбарго бекор қилингач, жорий йил май ойида хорижга рекорд кўрсаткичда нефть сотган. Бу рақам бир ойда 2,8 миллион тонна ёки кунига 662 минг баррелни ташкил этган. Бу ҳақда Reuters агентлиги Америка статистика бюроси (Census Bureau)га асосланган ҳолда хабар қилмоқда.

Бу 1920 йилдан бери энг йирик натижадир, деб қайд этади ахборот агентлиги. Америка нефтини асосан Канада (бир суткада 308 минг баррель), Нидерландия (110 минг баррель) ва Нидерландия қироллигига кирувчи Кюрасао (67 минг) харид қилган.

6 июль кунги хом-ашё биржаси савдоларида Brent русумли нефтнинг бир баррели 49,35 доллардан сотилган бўлса, WTI фьючерсларининг бир баррели 48,04 долларга баҳоланган. 

2015 йил 18 декабрида Америка раҳбари Барак Обама, Америка нефтини экспорт қилишга 40 йилдан ортиқроқ вақт муқаддам жорий қилинган тақиқни бекор қилувчи 2016 йилги давлат бюджетини тасдиқлаган эди. 


 

Кўпроқ янгиликлар