Аслида футбол тахминларни ёқтирмайди. Миллионлар ўйинининг бор жозибаси ҳам мана шунда бўлса керак. Чунки, ишқибозларга ўйин қандай ҳисоб билан якунланиши маълум бўлса, стадион томон ошиқмаган ёки телевизор орқали бериладиган трансляцияни орзиқиб кутмаган бўлар эди. Бизнинг қуйидаги тахминларимиз рақиб жамоаларнинг айни пайтдаги таркиби ва бошқа омиллардан келиб чиқиб келтирилган хулоса ва фаразлар, холос.

Ўзбекистонда хизмат кўрсатган мураббий Юрий Саркисян ҳамда спорт журналисти Элмурод Эрматов Евро – 2016 доирасидаги ярим финал баҳси олдидан ўз таҳлиллари билан ўртоқлашишди.

Германия - Франция ким ғолиб бўлади?

Юрий Саркисян, футбол мураббийи:

- Аслида бу жуда қийин савол, чунки мен ҳеч қачон бўлажак ўйин олдидан тахмин қилмаганман. Футболда қайси жамоани мураббий бўлажак ўйинга муносиб тайёрлаган бўлса, ўша жамоада ғалаба қозонади. Французлар ҳали мусобақа давомида ҳақиқий кучини намойиш этишга мос рақиб билан тўқнашганлари йўқ. Лекин, уларда ғолиб чиқишлари учун энг зўр омил бор: Дешам шогирдлари ўз уйларида, қадрдон ишқибозлари қаршисида тўп суради. Стадионга ташриф буюрганларнинг 90 фоизи қувватлаб туриши “учранглилар”га ўзгача куч бериши аниқ. Улар кам куч йўқотганлар, сабаби исландлар билан бўлган 1/8 баҳси жуда осон кечган. Немислар эса Италия термаси билан оғир ўйин ўтказди. Мезбон жамоада ҳар доим устунлик бўлган ва мазкур жиҳат эртага ҳам ўз сўзини айтади.

Элмурод Эрматов, спорт журналисти:

- Немислар чорак финалгача ўз дарвозасидан бирорта ҳам гол ўтказмай етиб келишди. Итальянларга қарши ўйинда ўтказилган ягона гол ҳам ўйин охирида пенальтидан киритилган. Терма таркибида ярим финал баҳсини Сами Хедира ва Марио Гомес жароҳат туфайли, Матс Хуммельс эса дисквалификация туфайли ўтказиб юборишига қарамай, Бастиан Швайнштайгер ва Бенедикт Хеведеслар умумий гуруҳга қайтишган. Лёв шогирдлари “учранглилар”да мавжуд кучли ҳужум чизиғини ҳисобга олган ҳолда, эҳтиёткорлик билан тўп суришади. Немислар ўзларининг интизомга асосланган самарали ўйинини яна бир бор намойиш этишлари аниқ. Ҳар икки терма ўз дарвозаси томонга аланглаб ўтказадиган ўйинда барчасини битта гол ҳал қилса керак ва ўша гол немислар томонидан киритилади.

Элмурод Эрматов, Андижон