Хитойнинг марказий ва шарқий минтақаларида бир ҳафтадан бери давом этган сурункали ёмғирлар оқибатида вужудга келган сув тошқинлари 181 кишининг ҳаётдан кўз юмиши ёки бедарак йўқолишига сабаб бўлган, деб хабар қилмоқда Associated Press.

Маълумотларга кўра, Янцзи дарёси соҳилида жойлашган, 8 млн киши истиқомат қиладиган Ухань шаҳрининг ўзига бир ҳафтада 57,4 см ёмғир ёққан. 

Ухань шаҳри расмий вакили ва давлат ОАВ 14 кишининг ҳалок бўлгани ва бир киши бедарак йўқолганини маълум қилган. Қарийб 170 минг киши кўчирилган, 80 минг нафар одам бошпаналарга жойлаштирилган. 

Фуқаролик ишлари бўйича миллий вазирликка кўра, қўшни минтақаларда 181 киши ҳаётдан кўз юмган ёхуд бедарак йўқолган.