Бугун Тошкентда биринчи Халқаро мева ва сабзавот ярмаркаси ўз ишини бошлади, бундан асосий мақсад - экспорт салоҳиятини кўтариш ва республика қишлоқ хўжалик саноатини янада юқори даражага олиб чиқиш. Мазкур ярмарка 12-14 июль кунлари "Ўзэкспомарказ" кўргазма мажмуасида ўтказилади. 

Ташкилотчиларнинг сўзларига кўра, ярмаркада тузилган шартномалар ҳажми анча юқори бўлиши кутилмоқда. Унда ҳар бир вилоят ўзининг мева ва сабзавот маҳсулотлари билан қатнашади. Бу мамлакатдаги энг кенг кўламли кўргазма ярмаркасидир. 16 июльга қадар "Ўзэкспомарказ"нинг бутун кўргазма майдони банд бўлади. 

Ярмаркада ҳар бир вилоят ўз маҳсулотини тақдим этиши учун алоҳида кўргазма павильонлари ажратилган. Шу билан бирга қайта ишланган маҳсулотлар, жумладан қуритилган ва музлатилган маҳсулотларга ҳамда қишлоқ хўжалигининг молиявий, транспорт, логистик инфратузилмасини шакллантирувчи муассаса ва компанияларга махсус жойлар ажратилди. Бундан ташқари ярмаркада таро-қадоқлаш компаниялари иштирок этишмоқда. Алоҳида майдонда шарқ бозори ташкиллаштирилган бўлиб, унда асосан турли зираворлар ва дуккаклилар намойиш этилган. 

Ярмарка давомида иштирокчи ва ташкилотчилар мева ва сабзавот жаҳон бозорининг тенденциялари ва истиқболларини батафсил таҳлил қилиш имкониятига эга бўлишади. Ишчи дастурдан экспортчилар ва импортчилар ўртасида икки томонлама музокаралар, интенсив боғлардаги ва маҳсулотларни қайта ишловчи корхоналардаги фаолият ҳамда совутиш мосламалари билан танишиш ўрин олган.